ILOILO CITY- 24 tanan ka panibag-o kag rationalized nga mga ruta sang Public Utility Jeepneys ang iga-introduce kadungan sang implementasyon Local Public Transport Route Plan (LPTRP) sa Iloilo City sa Hunyo 12.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office (PSTMO), iya ginpahayag nga mas madali nga ma-identify ang bag-o nga mga ruta bangud nga may yara ini sang number coding kag pangalan sang mga lugar kun sa diin ini nagalabay.
Suno kay Conlu, 24 hours ang byahe sa nasambit nga mga ruta kun sa diin may ipatuman nga shifting agud indi mawad-an sang salakyan ang mga commuters ano man nga oras.
Gin-athag naman ni Conlu nga sa pagsugod sang pagpatuman sang LPTRP, 80 % sang magabyahe amo ang traditional jeepneys sa gihapon bangud nga wala pa nag-abot ang mga modernized jeepneys nga ginbakal sang mga transport cooperatives.
