ILOILO CITY – Nagapabilin nga aktibo ang isa ka kaso sang Delta variant sang COVID-19 sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga 30 anyos nga taga-Mandurriao ang amo nga pasyente apang nagatrabaho sa isa ka kumpaniya sa distrito sang Molo.
Hulyo 9 sang nagpositibo sa COVID-19 ang amo nga pasyente kag nagpositibo pa gid sa repeat testing sang Hulyo 23.
Sa Western Visayas Medical Center (WVMC) gintest ang amo nga lalaki matapos nag-eksperyensya sang influenza-like illness.
Ginpadangat ang iya nga swab sample sa Philippine Genome Center (PGC) para sa sequencing bangud sang high viral load.
Kahapon lang nga adlaw nabaton sang Iloilo City Epidemiology and Surveillance Unit ang resulta sang sequencing halin sa Department of Health Epidemiology Bureau.
Ginapahayag nga wala sang travel history ang pasyente kag wala sang close contact sa workplace.
Wala man nabakunahan ang lalaki.
Suno sa alkalde, positibo man sa COVID-19 ang asawa sang lalaki apang istrikto nga ginhome-quarantine halin sang adlaw nga nagpositibo sila sa virus.
Negative naman sa balatian ang ila tatlo ka menor de edad nga kabataan.
