Naglab-ot na sa 79 ka mga indibidwal ang kumpirmado nga na-evacuate sa Iloilo City kag ini ang halin sa San Juan, Molo.
Sa interview sang Bombo Radyo kay Mr. Darwin Papa, Operation Officer sang Iloilo City Disaster Risk Reduction and Management Office, iya ginpahayag nga sa subong padayon pa ang ila validation sang mga data sa mga posible evacuees.
Suno kay Papa, may yara man sang narecord nga evacuees sa Jaro kag Arevalo apang wala pa ini na-validate kag nalakip sa ila report.
Dugang niya, may yara man sang mga na-record nga nagkalaguba nga mga propedad.
Nagkalautod naman ang mga wires sang kuryente matapos natumba ang puno sang sambag sa Burgos-Mabini , La Paz, Iloilo City bangud sa mabaskog nga hangin.
Sa interview sang Bombo Radyo kay Punong Barangay Lilibeth Eduardo, iya ginpahayag nga nagresulta man ini sa pagkautod sang suplay sang kuryente sa lugar.
Suno kay Eduardo, maswerte nga wala sang nasamaran ng tawo sa insidente.
Gilayon naman nga nangayo sang bulig sa city government ang mga pumuluyo agud makuha ang puno sang sambag kag mahawanan ang lugar.
Nabuka ang windshield sang isa ka salakyan nga naga-park sa Iloilo City Hall matapos nahulugan sang angle bar halin sa ibabaw nga porsyon sang Red Plaza.
Kabahin sa nahulog ang bahin sang rain water gutter sang nasambit nga building.
Nahulugan naman sang sanga sang kahoy ang windshield sang salakyan sa Commission Civil Street, Jaro, Iloilo City.
Natumbahan sang puno sang kahoy ang isa ka salakyan sa sulod sang West Visayas State University, main campus sa La Paz, Iloilo City.
Guba naman ang isa ka balay sa Simo Ledesma, Jaro matapos natumbahan sang puno sang duldol.
Sa interview sang Bombo Radyo kay Frelan Pioco, tag-iya sang balay, ara gid sa sulod sang balay ang iya kabataan kag asawa sang natumbahan sang duldol apang maswerte nga wala man naigo ang mga ini.
