ILOILO CITY – Nagpakigsapol si Iloilo City Mayor Elect Jerry Treñas sa mga job hires nga ginpahalin kadungan sang Espinosa Administration.
Sa interview sang Bombo Radyo kay Treñas, iya ginpahayag nga ang tanan nga ginpahalin nga job hires ang iya mga supporter nga madugay na nga nagatrabaho sa Iloilo City Hall.
Ginpahayag ni Treñas nga amat-amat na nga nagapasa sang ila requirements agud nga liwat nga makabalik sa trabaho.
Sa pagkamatuod suno kay Treñas, iya ginpromisa sang nagligad nga campaign period nga iya buligan ang mga job hires nga wala sang trabaho kag pahalinon ang mga job hire nga ginpasulod sa trabaho ni outgoing Iloilo City Mayor Jose Espinosa III.
Sa pihak sini, ginpahayag sang natungdan nga mahimo nga magbag-o man ang iya desisyon kag indi na lang pagpahalinon ang mga job hire nga ginbaton sang iya bilas nga si Espinosa.
Samtang, ginpahayag ni Treñas nga luyag nila buhion ang Beautification Program sa syudad sang Iloilo.
Suno kay Treñas, luyag niya nga ipatuman ang ‘massive tree planting’ sa mga center island, higad sang dalan kag higad sang suba agud nga makabulig sa pagpahagan-hagan sang epekto sang climate change.
Sa pagkamatuod suno kay Treñas, natalana nga makigsapol si City Budget Officer Ninda Atinado sa kilala nga landscaper nga si Shirley Sanders para sa maayo nga lanscaping sang tanom sa palibot sang syudad.
