ILOILO CITY – Ginbalik ni Iloilo City Mayor Jose Espinosa III kay Iloilo City Lone District Cong. Jerry Treñas ang basol kun nga-a naguba ang ila pamilya.
Sa interview sang Bombo Radyo kay Mayor Espinosa, wala niya napunggan ang magpahayag sang pagkadismaya sa iya bilas nga si Cong. Treñas.
Partikular nga gintumod ni Mayor Espinosa amo ang pahayag ni Cong. Treñas nga siya ang rason kun nga-a naguba ang ila pagtamdanay bilang magpamilya.
Sa pagpaathag ni Mayor Espinosa, kun gintuman lang ni Cong. Treñas ang iya promisa nga indi na magbalik liwat sa pulitika, kun tani wala na sang gamo.
Mas nagsingki si Mayor Espinosa sa nangin pahayag sang bilas batok sa iya tiayon nga si Gina Sarabia-Espinosa nga amo ang nagpatawag kay anay Punong Brgy. Jonas Belocello nga chief of staff sang mamalidha, agud nga matigayon ang P100 million nga deal tuhoy sa pulitika.
Ang P100 million ang ginapahayag kabaylo sang pagpahanugot ni Mayor Espinosa nga makabalik sa pulitika si Treñas.
Suno sa alkalde, butigon ang iya bilas rason nga siya ang ginapaguwa nga mala-in sa publiko.
Kadungan sini, ginbuyagyag man ni Mayor Espinosa nga sang napatay ang ila babayi nga ugangan, nagpamalibad si Cong. Treñas nga sa ila balay ihamyang ang bangkay.
Suno kay Espinosa, kasubong nga wala sang kabalaslan si Cong. Treñas sa ila ugangan.
Mahimo suno sa alkalde nga may yara sang ginatago ang mamalidha sa ila balay.
