ILOILO CITY – Ginpanginwala ni Mayor Jose Espinosa III nga may ginpahalin ini nga casual ukon job hires sa Iloilo City Hall.
Suno sa alkalde, halin sang una wala gid ini sang may ginpahalin nga job hires.
Ginpahayag ni Espinosa nga kun may yara man sang may gahum sa pagpahalin ukon pagdisiplina sang mga job hires, ini amo ang City Administrator.
Kun may makita ang Administrator nga sala, sarang niya marekomendar ang indi na pagpa-renew sang kontrata sang mga job hires.
Ginpabati-bati-an naman ni Mayor Espinosa ang mga empleyado sang siyudad nga nagabaton sang suweldo nagikan sa siyudad apang nagaserbisyo sa mga negosyante kag pribado nga indibidwal.
Sang ginpamangkot kun sanday sin-o kag pila, nagpangduha-duha naman ang alkalde nga magsabat.
Dapat suno sa alkalde nga ang nagabaton sang suweldo gikan sa siyudad ang nagatrabaho sang husto.
Una na nagguwa ang mga impormasyon nga ang ginpahalin nga mga job hires ang supporters ni Rep. Jerry Treñas.