ILOILO CITY – Indi maintyindihan ni Iloilo City Mayor Jed Patrick Mabilog ang mga akusasyon ni Presidente Rodrigo Duterte sa Iloilo may kaangtanan sa iligal nga droga.
Kasunod ini sang pagtawag sang Presidente sa Iloilo nga “bedrock of drugs”.
Suno sa alkalde, ginahimo sang Iloilo City ang tanan nga lihok agud matapna ang iligal nga droga gani natingala ini kun nga-a ginatawag ni Duterte nga bagsakan sang iligal nga droga ang Iloilo.
Kun ikumparar sa iban nga lugar nga kadamo sang mga na-tokhang, sa siyudad sang Iloilo suno kay Mabilog, may 3,180 lang gikan sa 449,000 nga populasyon.
Dugang pa ni Mayor Mabilog, nagapatigayon man ang city government sang drug rehabilitation para sa mga surrenderee, drug symposiums kag aktibidad sa mga barangay agud malikawan ang paggamit sang iligal nga droga.
Una na gintawag ni Presidente Duterte nga “most shabulized city” ang Iloilo kag sang damlahg lang ginbansagan nga “bedrock of drugs” bangud gina-export suno sa Presidente ang droga padulong sa Iloilo para sa ginpatay nga drug lord nga si Melvin Odicta Sr.