ILOILO CITY – Ginkakas sang Ombudsman bilang alkalde sang syudad sang Iloilo si Mayor Jed Patrick Mabilog.
Ini may kaangtanan sa kaso nga “serious dishonesty relative to unlawful acquisition of wealth”.
Sa dismissal order nga ginpaguwa sang Ombudsman, ginkakas sa serbisyo bilang alkalde si Mabilog.
Magluwas sini, indi man mahimo magpungko sa ano man nga opisina sang gobyerno kag indi man makabaton sang retirement benefits.
Ini may kaangtanan sa kaso nga ginpasaka ni anay Iloilo provincial administrator Manuel Mejorada.
Sadtong 2015 sang ginpasakaan ni Mejorada sang kaso nga plunder, dishonesty, grave misconduct kag perjury ang alkalde.
Santo sa complaint affidavit ni Mejorada, gina-alegar sini nga nagtaas sang P54 million ang manggad ni Mabilog matapos nga nagpungko ini bilang alkalde sang siyudad.
Wala gindeklarar sang husto ni Mabilog ang iya propiedad sa iya Statement of Assets, Liabilities and Net Worth (SALN) sang 2014.
Ginkwestyon ni Mejorada ang pag-angkon sang propiedad ni Mabilog nga indi man masarangan baklon sang iya nga suweldo bilang alkalde kag ang kita sini bilang negosyante.
Lakip na diri ang balay ni Mabilog sa Barangay Tap-oc, Molo, Iloilo City nga sang damlag lang gintawag ni Presidente Rodrigo Duterte nga mansion.
Napaslawan si Mabilog nga ideklarar sa iya SALN kun sa diin naghalin ang manggad sini.
Wala pa sang reaksyon ang alkalde, nga subong naka-sick leave pa sa gihapon kag nagatinir sa iban nga pungsod.
Ini apisar nga una na ginpahayag kahapon sang taghambal kag legal counsel sini nga si Atty. Mark Piad nga nakabaton sila sang impormasyon apang wala sila sang may gina-uyatan nga dokumento sa dismissal order.
Suno pa kay Piad, ginatugyan na lang sa Ginoo ni Mayor Mabilog ang tanan, lakip na ang pamahog ni Pres. Duterte nga ang alkalde na ang masunod.
Si Mabilog ang una na gintumod ni duterte nga drug protector.