ILOILO CITY- Dismayado si Iloilo City Mayor Jerry Treñas sa Department of the Interior and Local Government bangud sa ginahimo nga pagpamahog sang nasambit nga national agency sa mga opisyal nga yara sa Local Government Units (LGUs).
Sa interview sang Bombo Radyo kay Treñas, iya ginpahayag nga sa tagsa nila kahulag, halos may makita nga sala ang nasambit nga ahensya kag luyag lang sang mga ini nga sila lang ang ‘gwapo samtang sila sa LGU ang malaw-ay’.
Pahayag ni Treñas, madamo sila sang trabaho sa subong sa pagtungod sang kinahanglanon sang mga pumuluyo bangud sa coronavirus disease 2019 pandemic, apang halos pamahog ang gina-obra sa ila sang DILG.
Suno kay Treñas, kun luyag sang Department of the Interior and Local Government kag Department of Social Welfare and Development nga sila ang magpanghatag sang bulig, sila sa Local Government Unit ang magabulig nalang.
Nahibaluan nga indi ini ang una nga bes nga nagpabutyag ang alkalde sang iya pagkadismaya sa mga national agencies.
Una na niya nga ginkadismaya ang indi paghatag sang test kits sang Department of Health sa syudad kag Iloilo; ikaduha amo ang pagkadismaya man sini sa Department of Education bangud sa pagpangayo sang mga ini sang Memorandum of Understanding agod magamit ang mga eskwelahan bilang isolation facility,m kag ikatatlo, pagkadismaya sa Overseas Workers Welfare Association bangud may yara sang undocumented nga pasahero nga ginpakasakay ng ahensya sa barko nga nagdala sa mga repatriated Overseas Filipino Workers nagikan sa Cebu padulong sa Iloilo.
