ILOILO CITY – Ginahulat na gid lamang ni Iloilo City Mayor Jerry Treñas ang pormal nga deklarasyon sang National Inter-Agency Task Force for the Emerging Infectious Diseases nga nagabutang sa syudad sa alert level 1.
Sang nagligad nga Martes, nag apelar ang alkalde sa NIATF nga panubuan sa alert level 1 ang classification sang syudad bangud sa naganubo nga healthcare utilization rate (HCUR) kag avergae daily attack rate (ADAR).
Sa interview sang Bombo Radyo Iloilo sa alkalde, iya ginpahayag nga nakabaton na siya sang confirmation nagikan kay COVID-19 testing czar Secretary Vince Dizon kag Department of Interior and Local Government (DILG) Secretary Eduardo Año nga aprubado na ang apelar sang syudad nga i-de-escalate ang classification.
Suno sa alkalde, wala pa sang pat-ud nga petsa ang de-escalation bangud padayon pa ang pagsapol sang NIATF.
Sa idalom sang alert level 1, yara sa full capacity ang tanan nga opisina kag mga establishment nga makahatag sang trabaho ilabi na sa mga pigado.
Mabalik naman ang face-to-face classes.
Nagpasalig naman sang dugang nga suplay sang bakuna ang national government.
Samtang, nagpanawagan naman ang alkalde sa mga ginikanan nga pabakunahan na ang mga kabataan nga naga edad 5-11 anyos.
Suno sa alkalde, manubo ang numero sang mga kabataan nga nagapabakuna bangud mahimo nakulbaan ang mga ginikanan.
Nagpasalig naman ang alkalde nga wala sang may nareport nga adverse effects sa mga ginbakunahan nga mga kabataan sa sulod sang halos isa na ka bulan.
