ILOILO CITY — Ginkadismaya ni Iloilo City Mayor Jerry Treñas ang serbisyo sang Metro Pacific Iloilo Water (MPIW) sa mga residente sang Iloilo City bangud sa nagapabilin nga problema sa kakulangan sang tubig.
Sa interview sang Bombo Radyo kay Treñas, iya ginpahayag nga dako ang iya nga gina-ekspektar sa Metro Pacific Iloilo Water bangud dako ini nga sahi sang kompanya.
Suno kay Treñas, daw kaangay lang nga ginhimo sang kompanya nga water boy ang Iloilo City Government bangud lunsay pagpadul-ong lamang sang tubig ang ila mahatag.
Ginkwestyon man sini nga kun san-o mangin bastante ang supply sang tubig sang kompanya para sa mga konsumidor.
Plano naman sang alkalde nga sapulon ang Metro Pacific Iloilo Water bangud kun indi sini masarangan ang ila obligasyon, ihatag na lang sa South Balibago Water Works.
Ginpahayag man ni Treñas nga sugod sang nagpungko ini bilang alkalde sang syudad, wala gid sang may nabag-o sa problema sa tubig sang syudad.
