ILOILO CITY — Ginpaathag ni Iloilo City Mayor Jerry Treñas nga indi niya gusto ma-eksperyensyahan sang iya anak nga si Raisa Treñas-Chu nga wala sang partido kaangay sang natabo sa iya sang 2010 kag 2018.
Sa interview sang Bombo Radyo kay Treñas, iya ginpahayag nga bangud sa makapila na ka beses nga nakansela ang pagpanumpa sang Partido Federal ng Pilipinas (PFP), nagdesisyon na lang ini nga pangitaan sang lain nga Partido ang iya anak.
Suno kay Treñas, gindala niya na lang ang iya anak sa isa ka leadership training sang Partido Federal ng Pilipinas agud ipakilala sa mga opisyales sang amo nga partido.
Ginpahayag man sang alkalde nga apisar ano pa ang matabo, siguraduhon sini nga magkapartido ang iya anak para sa 2025 elections.
Nahibaluan nga nakatalana nga magsumpa si Raisa Treñas-Chu sa National Unity Party (NUP) sa masunod nga membership meeting sang amo nga partido.
