Ginpakamalaut ni Iloilo City Mayor Jerry Treñas ang mga kasumpong sini sa politika nga ginapahayag naga-pamahog sang pila ka mga Punong Barangay sa syudad sang Iloilo.
Nahibaluan nga pila na ka mga kapitan ang nagpadulong sa Philippine National Police (PNP) agud nga magpasaka sang panumbungon angut sa harrasment kag pagpamahog sang pila ka mga nagapadalagan sa lokal nga posisyon sa Iloilo City.
Ini ang kasunod man sa natabo nga pagsabtanay nanday Punong Brgy. Larry Palomo kag Mayoral Candidate Jun Capulot sang nagpadulong ang ila kampo sa Barangay MH Del Pilar, Jaro, Iloilo City.
Nagpost man sa Facebook ang anay councilor nga si Plaridel Nava nga grupo ni Capulot, nga ini ang nagpa-blotter sa police station bangud ginpahayag nga gin-harass sila ni Palomo.
Sa interview sang Bombo Radyo kay Treñas, iya ginpahayag nga mas maayo nga tutokan sang iya mga kasumpong ang pagpangampanya kag pagpalab-ot sang ila plano kun mangin opisyal sa syudad kag indi magtuga sang kinagamo ukon pagpamahug sa kabuhi sang mga tawo nga nagasuporta sa iya.
Nagpanugyan man ang alkalde sa mga tawo nga maka-eksperyensya sini nga magdangop sa mga pulis agud nga makapasaka sang kaso.
AV OF ILOILO CITY MAYOR JERRY TREÑAS on kasumpong
Sa interview naman sang Bombo Radyo kay Msgr. Meliton Oso, director sang Jaro Archdiocesan Social Action Center (JASAC), iya ginpahayag nga kinahanglan nga ipakigbato sang isa ka indibidwal ang iya kinamatarung bilang isa ka tawo.
Suno kay Msgr. Oso, ipaagi sa legal nga akto ang pagbalus sa ano man nga sahi sang pagpangmulay kag pagpamahug.
Mas maayo gid suno sa natungdan nga idangop ini sa mga otoridad kag magpasaka sang kaso.
