Iloilo City – Sukton kag pangitaon ni Iloilo City Mayor Jerry Treñas ang Iloilo City Police Office sa suporta nga ginhatag sang Iloilo City Government.
Sa interview sang Bombo Radyo kay Treñas, iya ginpahayag nga wala nagkulang ang alkalde sa paghatag sang suporta sa mga kapulisan.
Sa matuod, ginahingyo lamang sang alkalde nga obrahon sang mga kapulisan ang katungdanan sang mga ini sa syudad, apang napaslawan sa pagpakita sang manami nga resulta.
Suno sa alkalde, ginsabat na sang gobyerno ang gasto sang paggamit sang patrol cars, mga motorsiklo kag gatong, apang, haluson nga indi ini makita nga nagapatrolya sa mga dalanon sang syudad.
Dugang pa sang alkalde, gin-supply man sang gobyerno ang mga bala kag armas sa mga police personnel, dala na ang dog food para sa canine dogs.
Suno kay Treñas, sa una, nangin maayo man ang pagpadalagan sang Iloilo City Police Office sa syudad, apang sang nagapadayon ang pagtuhaw sang mga insidente sang krimen sa syudad, wala na ini nakitaan sang output.
Ini matapos ang nagluntad ang asud-asud nga insidente sang kinagamo sa distrito sang Mandurriao, kag ang pagkadakop sang 32 ka mga indibidwal nga naangot sa baklanay sang iligal nga droga.
Sa subong, ginhatagan ni Treñas si newly appointed Iloilo City Police Office Director Police Colonel Joeresty Coronica sang isa ka semana agud mahitso sa bag-o niya nga position ang pag-review sang deployment plan kag pag-ilis sang mga police personnel sa Mandurriao Police Station.
