ILOILO CITY – Ipasa-Diyos na gid lamang ni Iloilo City mayor Jerry Treñas ang paggamit sang iya pangalan sa isa ka prank order.
Nag-order sang pagkaon nga balor P8, 270 ang nagpakilala nga si Mayor Jerry Treñas sa isa ka restaurant sa distrito sang Jaro.
Sa interview sang Bombo Radyo Iloilo kay Treñas, iya ginpahayag nga may nagtawag sa iya opisina nga nagahilibi-on na ang cashier nga amo ang nagbaton sang order bangud siya ang pabayron sang management sang amo nga kantidad bangud wala sang may nag pick up sang pagkaon.
Ginpakamaayo sang alkalde nga bayaran na lamang ang pagkaon kag ginhatag sa iya mga staff.
Nagpaandam ang alkalde sa mga tag-iya sang kalan-an nga i-verify anay ang ang naga-order ilabi na subong nga eleksyon nga madamo sang tawo nga nagapangsasko.
Sa sini nga mga prank orders, makaluluoy ang mga empleyado nga amo ang manalo sang balayran.
Samtang, indi mahibaluan sang alkalde kun sin-o ang naggamit sang iya pangalan kag indi man niya matumod kun bala ang kasumpong niya sa pulitika ang may kahimuan.
Wala naman sang tuyo ang alkalde nga hibaluon pa kun sin-o ang responsable sa nasambit nga pagpanunto.
Mamalayran sa gihapon sang P3, 000 ang cashier sang restaurant bangud nagpangayo sang load ang nagpakunu-kuno nga si Iloilo City mayor Jerry Treñas.
Sa interview sang Bombo Radyo kay Mary Joy Linco, cashier sang restaurant, iya ginpahayag nga magluwas sa masobra P8, 000 nga balor sang pagkaon, nag-demand pa ang prankster nga magbakal sang soft drinks apang wala sang baligya ang restaurant rason nga nagtabok ini sa isa ka pharmacy kag didto kun tani mabakal.
Apang sang yara na sa pharmacy, nag-demand ang prankster nga ipaload nalang ang kwarta.
Gin-istorya pa niya ang staff sang pharmacy.
Dugang pa ni Linco, una nga ginpangayo nga load sang prankster ang nagdangat sa P2, 700 kag nagpadugang pa.
Nag-untat sa pag-load si Linco rason nga ginsinggitan siya sang prankster.
Nagakasubo si Linco bangud, siya ang mabayad sang P3, 000.
