ILOILO CITY – Magapadala sang sulat si Iloilo City Mayor Jerry Treñas kay Sec. Leonor Briones may kaangtanan sa paggamit sang pondo sang Department of Education para sa pagpasangkad sang online learning.
Sa interview sang Bombo Radyo kay Treñas, iya ginpahayag nga bangud nga wala sang face-to-face classes sa subong, mas makapaayo nga ang pondo para sa pagpatukod sang dugang nga school building ang gamiton anay para sa pagpasangkad sang internet connection kag sa pagbakal sang tablet nga mahimo magamit sang mga estudyante.
Suno kay Treñas, magluwas kay Briones, iya man nga padal-an sang sulat ang Inter-Agency Task Force kag si Department of National Defense Sec. Delfin Lorenzana.
Samtang, indi naman pabor ang alkalde tuhoy sa ginapatuman nga reduce physical distance sa mga pampubliko nga salakyan.
May kaangtanan diri, magapakigsapol siya sa mga tiglawas sang Land Transportation Office, Land Transportation Franchising and Regulatory Board kag Department of Health kun ano ang masunod nga lihok.
