ILOILO CITY– Magapatigayon sang pagsinapol si Iloilo City Mayor Jery Treñas sa kapulisan may kaangtanan sa iya plano nga ipa-repeal ang executive order no. 146 nga nagadumili sa pagbaligya sang makahulubog nga ilimnon paglampas sang las 2:00 sang kaagahun.
Sa interview sang Bombo Radyo kay Treñas, iya ginpahayag nga pagkatapos sang pagsinapol magahimo siya sang iya desisyon nga untaton ukon kanselahun ang implementasyon sang nasambit nga EO.
Suno kay Treñas agud makasiguro sa seguridad sang publiko, iya tan-awun ang posibilidad nga pabantayan sa kapulisan ang mga lugar nga may yara sang madamo nga tawo agud malikawan man ang pagluntad sang kinagamo.
Magluwas sa plano nga pagpauntat sang implementasyon sang EO 146, ginpahayag man ni Treñas nga makig-angot siya kay Mr.Ariel Castañeda, ang pinuno sang Local Economic Enterprise Office (LEEO) agud matinluan ang mga merkado publiko sa palibot sang syudad.
Suno kay Treñas, indi sini luyag nga may yara sang stagnant water, mahigko kag mabaho sa gihapon ang merkado sa iya pagpungko bilang bag-o nga alkalde sang syudad.
Nagapangabay man ang natungdan sa tagsa ka pumuluyo nga kuntani magbinuligay agud malab-ot ang tanan nga ginahandum para sa syudad sang Iloilo.
