ILOILO CITY – Ang padayon nga nagataas nga numero sang COVID-19 daily infections ang rason kun nga-a indi pabor si Iloilo City Mayor Jerry Treñas sa ginaduso sang Department of Transportation nga reduce physical distance sa pampubliko nga mga salakyan.
Sa interview sang Bombo Radyo kay Treñas, iya ginpahayag nga tuman ka importante ang physical distancing agud nga mapahagan-hagan ang local transmission sang virus rason nga may yara sang compliance team nga nagabantay sa palibot sang syudad.
Suno kay Treñas, kwestyonable kun nga-a dapat panubu-an ang physical distance sa pagsakay sa mga de-pampasahero nga salakyan samtang required naman ang 1 meter distance ukon masobra pa sa mga pampubliko nga lugar ukon sa pagsulod sa mga commercial establishment.
Ginpahayag ni Treñas nga ginapanugyan pa gani sang mga medical expert ang masobra sa isa ka metro nga physical distance agud nga malimitahan ang risgo sang paglaton sang virus.
Sa pagkamatuod suno sa alkalde, kadungan sang pagsinapol, bisan ang mga tiglawas sang Land Transportation Office, Land Transportation Franchising and Regulatory Board, Department of Health kag iban pa nga ahensya sang gobyerno ang nagpabor sa iya panindugan nga magapabilin ang 1 meter physical distance sa pagsakay sa de-pampasahero nga mga salakyan.
