ILOILO CITY — Nagapati si Iloilo City Mayor Jerry Treñas nga indi makapadaog ang partido sa isa ka kandidato ilabi na sa lokal nga eleksyon.
Sa interview sang Bombo Radyo kay Treñas, iya ginpahayag nga nakadependi sa gihapon sa hulag kag binuhatan sang isa ka politiko ang mangin basehan kun pagapilion ini sang mga pumuluyo.
Suno kay Treñas, daw kaangay lang ini sa iya nga inagyan sa politika, sugod 1998 tubtob subong, sa diin, nagsulod man ini sa nagkalain-kalain nga partido apang ginalantaw sa gihapon sang mga botante ang inagyan nga serbisyo sang isa ka kandidato.
Nagpaathag man ini nga anad na siya nga indi mangin “main character” bangud lunsay supporting character lang iya nga gingampanan.
Nagasalig man ini sa suporta nga ginpakita sang 197 ka mga punong barangay sa syudad lakip na ang mga former barangay captain.
Ginpadayaw man sang alkalde nga yara sa 96% sang mga kagawad ang yara sa ila alyansa ang suporta.
