Naghingyo si Iloilo City Mayor Jerry Treñas sa Commission on Elections (COMELEC) en banc nga dugangan sang 30 ka-adlaw ang voter registration period sa Iloilo City.
Ini ang ginpaagi sang alkalde sa pagpadala sang letter of appeal sa nasambit nga ahensya.
Sa interview sang Bombo Radyo kay Mayor Treñas, iya ginpahayag nga bangud ginpaidalom ang syudad sa asud-asud nga Enhanced Community Quarantine kag Modified Enhanced Community Quarantine status, naapektuhan kag na-postpone ang voter registration para sa 2022 national elections.
Suno sa alkalde, bilang demokratiko nga pungsod, importante nga pamatian ang tingog sang pumuluyo nga nagapanawagan sa pagpalawig sang voter registration period.
Tuman kataas man suno kay Treñas ang numero sang mga pamatan-on nga luyag makahingagaw sa pagparehistro agud ma-exercise ang ila kinamatarong sa pagboto.
