ILOILO CITY – Nagpagwa sang executive order si Iloilo City Mayor Jerry Treñas tuhoy sa pagbawal sang mga canned pork kag frozen products nga naghalin sa mga lugar nga apektado sang African Swine Fever.
Sa interview sang Bombo Radyo kay Treñas, iya ginpahayag nga ginadumilian ang pagpasulod sang mga canned pork and frozen products sa syudad, nagikan sa mga lugar nga apekttado sang nasambit nga balatian.
Suno kay Treñas ini ang isa ka paagi agud indi maapektuhan ang hog industry sa syudad sang Iloilo.
Pahayag pa ni Treñas, ginmanduan na niya ang city veterenary office nga ipatuman ang iya executive order sa diin gindugangan na niya ang tinawo sang nasambit nga talatapan para sa nasambit nga trabaho.
Dugang pa sang natungdan, pagalibuton sang city veterinary office ang mga supermarkets, malls kag mga merkado sa syudad agud masigurado nga wala sang kontaminado nga mga produkto nga nabaligya.
