ILOILO CITY – Nagpanawagan si Iloilo City Mayor Jerry Treñas sa publiko nga likawan ang mass gathering.
Ini ang kasunod sang pagdamo sang local transmission sang Coronavirus disease 2019 (COVID-19) sa Syudad sang Iloilo
Sa exclusive interview sang Bombo Radyo kay Treñas, iya ginpahayag nga magapagwa siya kuntani sang executive order nga nagadumili sa mass gathering tubtub sa Agusto 17, 2020.
Apang santo sa Iloilo City Legal Office, indi ini mahimo bangud wala ini nagasanto sa protocol sang Inter-Agency Task Force on Emerging Infectious Diseases (IATF-EID).
Suno kay Treñas, bangud wala sang executive order, magahingyo na lang siya sa pagdumili sa mass gathering lakip na sa mga religious organizations.
Pinaagi sa nasambit nga tikang suno sa alkalde, malikawan ang community transmission sang COVID-19.
Samtang, ginpahayag ni Treñas nga madamo ang nagakwestyon sa iya ginpagwa nga mando kaangot sa curfew.
Suno sa alkalde, mangin ang myembro sang iya pamilya ang nakibot man sa pagpatuman sang curfew umpisa las 8:00 sang gabi tubtub las 4:00 sang kaagahon.
Apang ginpahayag ni Treñas nga ini lang ang iya nakita nga pamaagi agud indi magdamo ang nagalagaw sa kagab-ihon kag malikawan ang pagtaas sang kaso sang COVID-19 sa syudad sang Iloilo
Samtang, nagapati naman ang alkalde nga ang pagdamo sang kaso sang indigenous cases sa Syudad sang Iloilo ang bangud sa kagaw nga ila nakuha sa Iloilo Fish Port Complex.
Suno kay Treñas, mismo ang COVID-19 Team sang Iloilo City Government ang nagpamatuod nga kalabanan ang mga barangay nga na lockdown ang may mga pumuluyo nga naga transaksyon sa Iloilo Fish Port Complex.
Ginpahayag sang alkalde nga ang mga nagabulante sang isda ang wala lang nagatinir sa mga kadagatan sa Iloilo bangud nagabaligya man ang mga ini sa Luzon.
Dugang pa sang alkalde, nakig-angot naman siya kay Iloilo Gov. Arthur Defensor Jr., agud mabuligan man sa pag monitor sa mga nagabulante sang isda sa kada banwa nga naga transaksyon man sa Iloilo Fish Port Complex.
