ILOILO CITY – Nakahanda si Iloilo City Mayor Jerry Treñas nga magpatunga sa away sang mga konsehal sa Iloilo City Council.
Sa interview sang Bombo Radyo kay Mayor Treñas, iya ginpahayag nga nakahanda siya nga magpangita sang paagi agud mahitso ang mga issue sa tunga sang mga konsehal.
Suno sa alkalde, indi manami lantawon ang ginapakita sa konseho.
Daku ang posibilidad nga maapektuhan ang pagserbisyo sa publiko sang mga konsehal kun magpadayon ang ila pagbinangigay.
Dugang pa sang alkalde, ginabantayan na sang publiko ang masunod nga matabo sa konseho.
Sang nagligad nga semana, diyutayan lang nga sumbagon ni Councilor Plaridel Nava si Councilor Rex Sarabia bangud nga wala nauyunan ni Nava ang suno sa iya pagkutaw-kutaw ni Sarabia nga nagakaon sang popcorn.
Sang Myerkules, ginsaruso ni Nava si Councilor Sedfrey Cabaluna matapos nga gintawag niya ini nga “Manong Nava”.
Samtang, nagaplano ang pamunuan sang Sangguniang Panlungsod sa Iloilo nga magpagwa sang Memorandum of Final Warning batuk sa anuman nga disorderly bahavior nga matabo sa konseho.
