ILOILO CITY – Wala pa gina rekomendar ni Iloilo City Mayor Jerry Treñas nga pabalikon sa eskwelahan ang mga estudyante sa pagbukas sang klase sa maabot nga Agosto 24.
Ini ang base sa rekomendasyon sang Department of Education nga mahimo sugudan na ang klase sa Agosto.
Sa interview sang Bombo Radyo kay Mayor Treñas, iya ginpahayag nga wala pa niya gina rekomendar nga mag gwa ang mga kabataan sa ila puluy-an bangud makabig sa gihapon nga delikado para sa ila ang tiyempo subong bangud man sa padayon nga pagsaka sang kaso sang Coronavirus Disease 2019.
Suno kay Treñas, kun ang mga tigulang nabudlayan pa magsunod sa mga pagsulundan pat-ud niya nga mas mabudlayan ang mga estudyante bangud man nga kabahin na sa ila pagginawi ang mahinampangon gani mabudlay para sa ila nga sundon ang physical distancing kag iban pa.
Dugang sang natungdan, indi man mahimo nga mapilit ang mga ginikanan nga ipadala ang ila mga kabataan sa eskwelahan bangud pat-ud man nila nga delikado pa ini.
Santo sa pahayag sang alkalde, mas importante ang ikaayong lawas kag kahilwayan sang mga kabataan kag wala man sang mangin problema kun ipaiway anay ang pagbukas sang klase sa mga eskwelahan.
