ILOILO CITY – Ginkumpirma ni Iloilo City Mayor Jed Patrick Mabilog nga nag-resign na ini bilang miyembro sang Liberal Party (LP).
Sa interview sang Bombo Radyo kay Mabilog, ginpahayag sini nga nagpasa na ini sang resignation letter sa presidente sang LP nga si Sen. Francis Pangilinan.
Suno kay Mabilog, ginpakamaayo sini nga mangin independent na lang kag gin-athag nga wala pa sang plano nga magsaylo sa iban nga partido.
Ini kasunod sang mga huring-huring nga isa ini sa mga kondisyon agud makasulod sa partido ni Presidente Rodrigo Duterte nga Partido Demokratiko Pilipino-Lakas ng Bayan (PDP-Laban).
Ginpahayag sang alkalde nga nakonsulta naman sini ang iya pamilya ilabi na sa pakaduha nga si Sen. Franklin Drilon antis nagdesisyon nga magbiya sa LP.
Ginpanginwala man sang alkalde nga ang pagpakamalaot nga naangkon sini halin kay Duterte sa diin ginbansagan ini nga narco-politician, ang rason sa paghalin sini sa LP.
Sa subong, wala pa sang plano si Mabilog para sa masunod nga eleksyon.