ILOILO CITY – Nagapati si Iloilo City Mayor Jed Patrick Mabilog nga wala nagalab-ot sa igtalupangod sang national government ang mga tikang nga ginabuhat sang city government para tapnaon ang iligal nga droga.
Ini matapos nga gintawag sang Presidente ang Iloilo nga “bedrock of drugs”.
Suno sa alkalde, posible nga wala nagalab-ot sa talatapan ni Duterte ang kampanya sang city government batok sa illegal drugs.
Dugang pa ni Mayor Mabilog, ginahatag sang city government ang tanan nga suporta sa mga otoridad sa tagsa ka operasyon sang mga ini batok sa iligal nga droga.
Ginpahayag sang alkalde nga kun ikumparar sa lugar ni Duterte nga Davao City, mas manubo ang numero sang mga drug surrenderees sa siyudad sang Iloilo.
May yara lamang sang 3,180 nga drug surrenderees sa Iloilo City gikan 449,000 nga populasyon sini samtang sa Davao City, nagalab-ot sa 12,000 ang mga drug surrenderees.
Nagalaum si Mayor Mabilog nga kuntani matalupangdan man sang mga ahensiya sang gobyerno ang pagtinguha sang Iloilo City nga matapna ang iligal nga droga.