ILOILO CITY – Ginpahanumdom ni Presidente Rodrigo Duterte ang bag-o nga alkalde sang Iloilo City nga si Mayor Jose Espinosa III batok sa involvement sa iligal nga droga ukon mangin protektor sang mga drug personalities.
Kadungan ini sang pag-atubang ni Espinosa kay Duterte kahapon sa Malacañang kun sa diin gin-ako sang alkalde nga wala madula ang illegal drugs sa ila gin-istoryahan.
Sa interview sang Bombo Radyo, ginpahayag ni Espinosa nga liwat na naman na-mention sang presidente ang may kaangtanan sa napatay nga drug lord nga si Melvin Odicta.
Nagdugay sang kapin 30 minutos ang pag-istoryahanay kun sa diin upod ni Espinosa sanday Sen. Cynthia Villar kag Iloilo Fourth District Rep. Ferjinel Biron.
Kadungan sini, personal nga ginpalab-ot ni Mayor Espinosa kay Duterte ang imbitasyon agud magtambong sa 50th Dinagyang Festival sang Iloilo City sa January 2018.
Suno pa sa alkalde, gintawag mismo sang presidente si Presidential Assistant Bong Go agud masal-ot sa schedule ang pagtambong sa Dinagyang Festival.
Ginkalipay naman ni Espinosa nga ginbaton ini sang Presidente sa pihak sang panan-aw ni Duterte sa siyudad sang Iloilo nga “bedrock of illegal drugs” kag “most shabulized city”.
Gin-ako sang alkalde nga siya ang naghingyo nga mag-atubang sa presidente kag ginhingyo ang bulig ni Sen. Villar.
Si Espinosa ang nagbulos sa puwesto ni anay Mayor Jed Patrick Mabilog nga gintumod ni Duterte nga drug protector.