Padayon ang paghatag sang bulig ni Iloilo City Mayor Raisa Treñas sa mga pumuluyo nga apektado sang Bagyo Crising nga nagdala sang mabaskog nga ulan kag hangin sa syudad.
Sa interview sang Bombo Radyo kay Joy Fantilaga-Gorzal, spokesperson ni Mayor Treñas, iya ginpahayag nga naglab-ot na sa 2,250 ka mga pamilya ukon kabug-usan nga 7,703 ka mga indibidwal ang apektado sang kalamidad.
Suno kay Gorzal, 28 ka mga barangay sa syudad ang nabahaan, kag may 14 ka mga balay nga nagkalaguba bangud sang mabaskog nga hangin dala sang habagat.
Nagpanghatag sang kapin 240 ka mga food packs ang City Social Welfare and Development Office sa mga indibidwal nga apektado.
Sa pihak nga bahin, nagbulig man ang Department of Social Welfare and Development (DSWD) Region 6, nga nagpadala sang 339 ka family food packs para sa mga pamilya nga nagapabilin sa 12 ka mga evacuation centers.
Ginatagaan man sang City Health Office sang igtalupangod ang posible nga balatian nga leptospirosis, gani nagapadayon ang ila pagpanghatag sang libre nga mga bulong batok diri.
