ILOILO CITY- Magasapol ang League of Cities of the Philippines agud istoryahan kun paano makabulig sa national government sa procurement sang COVID-19 vaccine para sa mga Filipino.
Sa interview sang Bombo Radyo kay Iloilo City Mayor Jerry Treñas, iya ginpahayag nga ang pagsinapol kaupod sa pila ka alkalde ang may kaangtanan sa pag-designate sa iya bilang chairman sang isa ka kumitiba sa League of Cities matapos nagkumiter ini nga magagasto sang kaugalingon nga kwarta ang Syudad sang Iloilo kag indi na magsalig sa gobyerno sa pagprocure sang bakuna.
Ginpahayag ni Treñas nga positibo ini nga magailog man ang iban nga mga syudad sa amo nga inisyatibo agud magmag-an ang palas-anon sang gobyerno para pondohan ang pagbakal sang COVID-19 vaccine.
Luyag sang opisyal nga buligan man ang iban nga mga syudad nga wala sang pondo nga makapangita sang kwarta agud ibakal man sang bakuna para sa ila mga pumuluyo.
Target naman sang alkalde nga makighinun-anon sa League of Provinces and League of Municipalities agud nga maengganyo man ang mga ini nga magmato-mato sa pagpangita sang pondo.
Gindugang pa sang alkalde nga importante nga maistoryahan man ang pila ka mga concerns may kaangtanan sa pagprocure sang bakuna kaangay sang gasto sa transportation kag storage facilities agud nga mapreparahan kag makapangita sang iban nga alternatibo samtang temprano pa.
Nahibaluan nga ang Florete Group of Companies sa pagpanguna sang chairman nga si Dr. Rogelio Florete ang una nga nagsabat sa panawagan ni Mayor Treñas nga hatagan sang libre nga COVID-19 vaccine ang iya mga regular nga empleyado.
