ILOILO CITY– Nag-alburuto sa kaakig si Iloilo City Mayor Jerry Treñas kadungan sang ginpatigayon nga flag- raising ceremony kaupod ang mga opisyal sang Iloilo City Government kag mga empleyado sang Iloilo City Hall.
Sa iya nangin mensahe sa atubang sang tanan nga empleyado, gin-isa-isa ni Mayor Treñas ang mga departamento sa Iloilo City Government nga ginareklamo bangud ginapabudlayan ang mga pumuluyo sang syudad sa ila transaksyon.
Partikular nga gin-akigan sang alkalde si Jeane Garingalao sang City Social Welfare and Development Office; Butch Peñalosa, City Planning Officer sang City Planning and Development Office; Cherry Jover-Ampig sang Local Civil Registrar; kag amo man ang Iloilo City Engineer’s Office kag City Zoning Administration.
Suno sa alkalde, kun indi luyag sang mga ini nga mag-upod sa iya plano nga tadlungon ang Syudad sang Iloilo, mas maayo nga magbiya nalang ang mga ini sa ila posisyon.
Nagpaandam naman ang alkalde sa mga departamento nga wala naga-ugyon sa iya plano nga pagtadlong sa syudad nga panglawagon niya ang mga ini sa kada pagpatigayon sang flag raising ceremony sa Iloilo City Hall.
Samtang nahangpan naman ni Iloilo City Councilor Ely Estante,chairman sang Committee on Infrastructure sa Iloilo City Council ang ginhalinan sang pag-alburuto sang alkalde.
Suno kay Estante, sang nagligad nga semana pa lang, nag-ibwal na sa kaakig si Treñas matapos mahibaluan ang natuhoy sa mga reklamo batok sa nasambit nga indibidwal kag sa mga departamento nga ila ginpamunuan.
