ILOILO CITY – Nagpangayo sang paghangop sa mga Ilonggo si Iloilo City Mayor Jerry Treñas sa pagkansela niya sa mga aktibidad sa syudad sang Iloilo kasunod sang pagpaidalom sang Pilipinas sa code red may kaangtanan sa nagataas nga kaso sang coronavirus disease 2019.
Sa interview sang Bombo Radyo kay Mayor Treñas, iya ginpahayag nga lakip sa mga aktibidad nga ginkansela niya amo ang Iloilo Summer Arts Festival, Paraw Regatta Festival, Liberation of Panay kag ang moving up ceremony sang Day Care.
Suno kay Treñas, ang mga certificate sang mga kabataan sa Day Care ang idiretso gilayon sa mga ginikananan.
Pahayag niya, magasapaol siya kaupod ang Iloilo City Health Office kag Liga nga mga Barangay President agud nga hibaluon kun ano pa nga mga tikang ang nagakadapat nga himuon ilabi na sa mga magahiwat sang convention sa syudad.
Apisar nga naapektuhan sang dako ang ekonomiya sang syudad bangud sa kanselasyon sang mga flights, ang importante dugang pa sang alkalde amo ang safety sang mga Ilonggo bangud makita pa ang kwarta kag ang kabuhi sang tawo ang isa lamang.
Exempted man ang Iloilo City Government sa pagpatigayon sang flag ceremony.
