Magapanaug pa gid ang healthcare utilization rate (HCUR) sa syudad sang Iloilo bangud malapit na lang mag-umpisa sa pag-operate ang modular field hospital nga nahamtang sa Brgy. So-oc, Arevalo, Iloilo City.
Nag-isyu na ang Health Facilities and Service Regulatory Bureau sang Department of Health (DOH) sang License to Operate sa The Medical City (TMC)-Iloilo nga amo ang partner sang syudad para sa operasyon san nasambit nga modular hospital.
Sa interview sang Bombo Radyo kay Iloilo City Mayor Jerry Treñas, iya ginpahayag nga magaserbe ini bilang hospital extension facility nga may kapasidad nga 77 ka Covid-19 beds.
Iga-cater diri ang mild kag moderate cases sang COVID-19.
Ang pagtukod sang healthcare facilities ang ginaduso gid ni Treñas agud nga indi magginutok ang city hospitals kag mahagan-hagan ang HCUR sa Iloilo City.
Nahibaluan nga kun magtaas ang HCUR, daku man ang posibilidad nga magsaka ang alert level sang isa ka probinsya ukon syudad.
