ILOILO CITY – Nagpaandam ang isa ka disaster resilience expert sa padayon nga pag-usmod sang Iloilo City.
Sa interview sang Bombo Radyo kay Jessica Dator-Bercilla, Science-Policy Interface Fellow at the National Resilience Council (NRC), iya ginpahayag nga 9 millimeters kada tuig ang pag-usmod sang syudad sa diin kaangay ini sang sitwasyon sa Venice, Italy.
Suno kay Bercilla, nagakadapat nga maghimo sang tikang ang local government agud masolusyunan ang pag-usmod sang duta, ilabi na nga nahamtang ang syudad sa delta kag floodplain nga lugar.
Ginpahayag sini nga ang pag-usmod sang duta ang naobserbahan sa Mandurriao, Molo kag La Paz sa diin kada tuig may yara sang 4.0 tubtob 8.8 millimeters nga pagnubo kag natumod gamit ang interferometric synthetic aperture radar.
Pila sa mga rason suno sa natungdan sa pag-usmod sang duta amo ang pagkutkot sang mga bubon kag pagsemento sang tanan nga mga duta.
