ILOILO CITY-Nagaisahanon ang Syudad sang Iloilo sa bilog nga Western Visayas nga ibalik sa General Community Quarantine (GCQ) umpisa Agosto 16 tubtob Agosto 31.
Ini ang ginkumpirma ni Presidential Spoksperson Atty. Harry Roque subong nga adlaw, Agosto 15.
Kabahin sa ibalik sa General Community Quarantine (GCQ) amo ang Nueva Ecija, Batangas, Quezon, Cebu City, Mandaue City, Lapu-Lapu City, Talisay City, Minglanilla, Consolacion, Cebu.
Magapabilin naman nga yara sa Modified General Community Quarantine ang nabilin nga bahin sang pungsod.
Kasunod sini, ginpahayag naman ni Iloilo City Mayor Jerry Treñas nga nagakaigo nga ipaidalom gid man sa General Community Quarantine ang Iloilo City bangud nagapanguna na ini sa Western Visayas sa may pinakamadamo nga kaso sang COVID-19 nga yara na sa masobra 600 sa diin 501 diri ang local transmission.
Suno kay Treñas, sa idalom sang General Community Quarantine, magapabilin sa gihapon ang pagpatuman sang curfew humalin alas-otso sa gab-i tubtob alas-kwatro sa kaagahon, 50 percent lang sang total capacity sang mga restaurants ang pahanugutan kag amo man sa mga opisina kag public transport, kag pagdumili sang pagpatigayon sang exercise sa Esplanade.
May kaangtanan naman sa hingyo sang alkalde sa judiciary nga ipaiway anay ang pagpatigayon sang hearing , iya ginpahayag nga liwat niya ini nga atenderon kag plastaron sa Lunes kadungan sang iya pagbalik na sa opisina matapos gin-quarantine.