Nagapabilin nga yara sa Alert Level 1 status ang Iloilo City sumugod subong nga adlaw Marso 16 tubtob Marso 31 base sa pinakaulihi nga ginpagwa nga desisyon sang Inter-Agency Task Force on Emerging Infectious Diseases.
Nagapabilin naman sa Alert Level 2 status ang Probinsya sang Iloilo.
Lakip sa mga ginpaidalom sa Alert Level 1 status ang National Capital Region kag 45 ka iban pa nga probinsya kag syudad sa pungsod.
Sa Western Visayas yara sa Alert Level 1 status ang Aklan, Bacolod City, Capiz, kag Guimaras.
Samtang, wala naman sang pagbag-o sa mga pagsulundan sa syudad sang Iloilo kasunod sang pag-extend sa alert level 1.
Sa interview sang Bombo Radyo kay Mr. Jeck Conlu, spokersperson sang COVID-19 team sang syudad, iya ginpahayag nga natalana nga magpagwa sang executive order ang alkalde nga naga-extend sang classification sang syudad.
Sa idalom sang alert level 1, 100% na ang capacity sang tanan kag indi na pag-ipatuman ang “no vaccine, no entry” policy sa mga opisina kag establishments.
Nagapanugyan sa gihapon ang COVID-19 team sa publiko nga magsunod sa gihapon sa minimum health protocol.
Dugang pa ni Conlu, wala pa nakasabat ang IATF angut sa appeal nga ipaidalom ang syudad sa alert level 0.
Samtang, nagapanawagan man ang syudad sa ginikanan sang mga kabataan nga naga-edad 5-11 anyos nga magpabakuna bangud nakita sang team nga manubo ang turn out sang mga nagapabakuna sa nasambit nga age range sang mga menor de edad.
