ILOILO CITY- Ginpakamaayo na lang sang Iloilo City Government nga magbakal sang fire truck matapos nga namalibad ang Department of the Interior and Local Government nga maghatag.
Sa interview sang Bombo Radyo kay Mayor Jerry P. Treñas, iya ginpahayag nga nagsulat siya sa Department of the Interior and Local Government agud magpangayo sang fire truck apang nagsabat ang ahensya nga ginahatagan prayoridad ang mga local government units nga wala pa sang fire truck.
Bangud sini, nag-acquire ang syudad sang fire truck nga nagabalor sang PHP2.8 million nga iga-donar sa Bureau of Fire Protection (BFP).
Suno kay Treñas, ang pagtukod sang Iloilo City Action and Response Care (ICARE) centers ang nagakinahanglan gid sang dugang nga fire trucks.
Gindugang naman sang alkalde nga may ginapaabot ang syudad nga ladder truck nga sarang makalab-ot tubtob sa 14 ka panalgan.
Suno sa alkalde, donasyon ini gikan sa South Korea paagi kay anay Bureau of Fire Protection-Western Visayas director Fire Supt. Jerry Candido.
