ILOILO CITY — Naglunsyar ang Iloilo City sang libro nga may tig-ulo “Iloilo City Rises – Padayon sa Pag-Uswag” agud ipakita ang legasiya sang syudad sa mga naglinigad nga tinuig tubtob subong.
Sa interview sang Bombo Radyo kay Narzalina Lim, Editorial and Production Director sang nasambit nga libro, iya ginpahayag nga naga-unod ang libro sang mga istorya kag laragway sang pag-uswag sang Iloilo City nga ginakabig nga isa ka dunang manggad sang mga Ilonggo.
Suno kay Lim, lakip sa unod sang libro ang kapin 300 ka mga nagakalain-lain nga lugar sa syudad nga nagapakita sang katahum kag kabuganaan sang City of Love.
Ginpahayag man sini nga may yara sang 7 ka chapter ang libro nga kabug-usan nga 255 pages.
Tuyo sang kahiwatan nga mapasanyog ang kultura kag mahatagan sang importansya ang tagsa ka Ilonggo nga nagbulig agud malab-ot ang kadalag-an sang Iloilo City.
Nahibaluan nga nagtambong sa book launching sanday Iloilo City Mayor Jerry Treñas, former Senator Franklin Drilon kag Lopez Family.
