Ginakabig sang Iloilo City National High School nga dako nga kadulaan sa ila buluthuan ang pagtaliwan sang mag-asawa nga manunudlo bangud sa nagluntad nga sunog sa Barangay Infante, Molo, Iloilo City.
Ang mga biktima amo sanday Julius Reyes kag Louelyn Reyes nga pareho nga manunudlo sang Special Program in the Arts sa Iloilo City National High School, kag ang ila anak nga si Amber Marie, pito ka tuig.
Sa interview sang Bombo Radyo kay Alpha Java, Principal sa Iloilo City National High School, iya ginpahayag nga naka-focus ang duha ka manunudlo sa Program in the Arts Major in Visual Arts.
Suno kay Java, nagaserbe nga coach ang mga biktima sa patag sang arts kon sa diin, makapila na ka beses nga nagdala sang kadalag-an sa ila buluthuan.
Ginpahayag man sini nga dako nga asset sa ila ang mag-asawa ilabi na sa buluthuan bangud masami nga nagadaog ang mga estudyante nga ila gina-train.
Halin Grade 7 tubtob Grade 10 naman ang ginatudlo-an sang manunudlo sa idalom sang Special Program in the Arts ukon SPA.
Ginlaragway man sini nga manami klase nga manunudlo ang duha kon sa diin, wala gid siya sang isaway.
