Ginpasalig sang Iloilo City Operation Center (OPCEN) nga naga-monitor sila 24/7 kag ginapalab-ot gid nila gilayon sa natungdan nga opisina kun may concern ang mga pumuluyo sa syudad ilabi na subong nga mamunog nga mga pag-ulan ang ma-eksperyensyahan.
Sa interview sang Bombo Radyo kay Mateo Malicia, Operation Center Staff sang City Disaster Risk Reduction and Management Office (CDRRMO), iya ginpahayag nga mahimo sila malab-ot sa ila landline kag social media page sa bisan ano nga oras.
Suno kay Malicia, kun may problema nga ginapalab-ot, gina-refer nila ini sa responsable nga opisina kaangay sang City Social Welfare and Development Office (CSDWO), General Services Office (GSO), City Engineer’s Office (CEO), kag City Environment and Natural Resources Office (CENRO).
Sang nagligad nga Huwebes suno sa natungdan, naka-conduct naman ang opisina sang pre-disaster risk assessment kaupod sa mga responders agud mahibaluan ang kinahanglan himuon kag kinahanglan likawan nga hazards nga dala sang pag-ulan-ulan.
Nag-abiso man ini sa mga pumuluyo nga magpabilin gid nga aligmat kag mag-monitor gid sa dalagan sang panahon.
