Padayon ang ginapasangkad nga preparasyon sang Iloilo City para sa patigayunon nga 49th High-Level Task Force in ASEAN Economic Integration sa Pebrero 25-27, 2026.
Sa interview sang Bombo Radyo kay Mayor Raisa Treñas, iya ginpahayag nga nag-deploy na sang dugang nga augmentation ang kapulisan agud masiguro ang seguridad sang mga delegado kag maga-bisita sa syudad.
Nagpatigayon naman sang ocular visit sa mga venue sang patigayunan sang aktibidad kaupod ang regional agency kahapon nga adlaw.
Suno pa sa alkalde, dako nga bugal ini para sa syudad bangud ginapakita sini nga handa na ang Iloilo City sa pag-host sang mga kaangay sini nga international events.
Bilang chairman sang Economic Development Committee sang Regional Development Council-6, ginpahayag ni Treñas nga dako ini nga oportunidad para sa Western Visayas agud ma-highlight ang mga nagkalain-lain nga industriya sa rehiyon.
Paagi sa ASEAN meeting, mahimo ma-promote ang local products pareho sang handicrafts sa mga pungsod nga kabahin sang Association of Southeast Asian Nations ukon ASEAN.
Dugang pa niya, ang pagkabaton sang Iloilo City sang ASEAN Clean Tourist City Award nagahatag sang dako nga impact sa imahe sang syudad bilang isa ka high-urbanized city nga ginakilala sa katinlo sini kag maayo nga pagdumala sa syudad.
Nahibaluan man nga ang Iloilo City ginpasidunggan bilang UNESCO Creative City of Gastronomy, nga amo ang labing una kag isahanon nga syudad sa bug-os nga Pilipinas nga nakabaton sang kaangay nga pasidungog.
Nagapakita man ini sang mabakod nga reputasyon sang syudad kun pagahambalan ang culinary excellence sa pungsod.
