ILOILO CITY – Gin-athag ni Iloilo City Office Director Police Colonel Joeresty Coronica nga wala ini sang police personnel nga kabahin sang ‘ninja cops’.
Ini matapos nga narekober sang Philippine National Police kag Philippine Drug Enforcement Agency ang masobra isa ka tonelada sang droga nga nagdangat sa P6.7 billion kay Police Master Sergeant Rodolfo Mayor Jr. nga isa man ka myembro sang Philippine Drug Enforcement Group sa Tondo, Manila.
Sa interview sang Bombo Radyo kay Coronica, iya ginpahayag nga ginadisiplina niya ang mga police personnel kag ginapanugyanan ang mga ini nga indi pagdulaon sa paminsaron ang ginsumpaan nga katungdanan.
Suno kay Coronica, ginapaliwat-liwat niya sa mga kapulisan nga indi mangikilkil kag mag-intra sa ano nga sahi sang aktibidad nga may kaangtanan sa illegal drug trade.
Ginpahayag dugang sang natungdan nga agud siguraduhon nga wala sang ninja cops sa syudad, may yara ini sang counter intelligence unit nga nagatsikyar kun bala may partisipasyon ang mga kapulisan sa iligal nga aktibidad.
Sa subong, nagapadayon ang monitong ni Coronica agud mapasiguro nga wala sang presensya sang ninja cops sa iya hanay.
