ILOILO CITY– Ginpasidunggan sa pinakauna nga kahigayunan ang Iloilo City Police Office bilang Most Outstanding City Police Office of the year sa ginpatigayon nga 24th Police Community Relations Month.
Ang awarding ang ginpatigayon mismo sa Philippine National Police National Headquarters sa Camp Crame.
Tema sang kahiwatan amo ang “Sambayanan mahalagang kaakibat ng kapulisan sa pagtaguyod ng mapayapa at maunlad na bayan” kag ginhiwat ini sa Camp Krame.
Personal naman nga ginbaton ni Iloilo City Police Office Director Police Col. Martin Defensor Jr., ang nasambit nga pasidungog.
Sa interview sang Bombo Radyo kay Police Lt. Col. Petronilla Navales pinuno sang Police Community Relations Section sang Iloilo City Police Office, iya ginpahayag nga tuman ang ila kalipay bangud sa pasidungog nga nabaton.
Suno kay Navales posible nangin rason sang ila kadalag-an amo ang mga proyekto nga ila ginpatigayon kaangay sang Project Tsinelas, Poster Making Contest, Bag of Hope, Project Palangga, Gift giving kag Feeding programs.
