ILOILO CITY- Magapatigayun sang caravan las 6:30 subong nga aga ang Iloilo City Police Office (ICPO)- Women and Childrens Protection Desk (WCPD) agud ilunsyar ang season inter-district basketball league sang project BONG ukon Bringing Order to the Nemesis of Gangs’.
Sa interview sang Bombo Radyo kay Police Captain Shiela Mae Sangrines, tagpamaba sang ICPO, iya ginpahayag nga magalawig sang duha ka adlaw ang nasambit nga kahiwatan sa diin maga-umpisa ini sa isa ka caravan nga maga-umpisa mismo sa talatapan sang ICPO kag magatakop sa gym sang Veterans Village, Iloilo City Proper.
Suno kay Sangrines, ang caravan ang pagapasakupan sang ICPO-WCPD,mga kabataan sa idalom sang project Bong, Philippine National Police (PNP) band, Transportation Management and Traffic Regulation Office (TMTRO), marshalls kag iban pa nga katapo sang PNP.
Ang basketball suno kay Sangrines ang isa man ka manami nga estratehiya agud mag-inamiguhay ang mga kabataan nga katapo sang gang nga na-rescue sang kapulisan sa tagsa ka mga distrito.
Nagapangayo naman sang paghangop ang ICPO-WCPD sa posible maapektuhan sang caravan sa diin mahimo magpugok ang dalagan sang trapiko.
