ILOILO CITY – Gindayaw ni Iloilo City Police Office director Police Colonel Joeresty Coronica ang performance sang Iloilo City Drug Enforcement Unit sa pagpamuno ni Police Lieutenant Colonel Antonio Benitez, Jr. bangud sang dako nga operasyon batuk sa iligal nga droga nga ginpatigayon sang damlag lang.
Kung madumduman, nakuhaan sang masobra sa P1 million nga balor sang iligal nga droga ang isa ka high-value individual sa Barangay Lanit, Jaro, Iloilo City.
Ang durugista ang nagsaylo lamang sa lugar bangud nga mainit na sa mata sang otoridad ang Barangay Bakhaw, Mandurriao kun sa diin ini residente.
Sa interview sang Bombo Radyo kay Coronica, iya ginpahayag nga bag-o pa lamang siya nagpungko nga officer-in-charge kag amo man si Benitez apang dako na ang accomplishment.
Dugang pa niya, isa ka bodegero sang droga ang nadakpan gani, dako gid ang epekto sang operasyon sa suplay sang iligal nga droga sa syudad.
Nagpasalig man si Coronica nga padayon ang paglagas sang otoridad sa mga durugista kag nagpa-andam man ini nga mapreso gid ang mga iligalista sa tion nga indi sa gihapon mag-untat.
