ILOILO CITY– Mas hugton pa sang Iloilo City Police Office ang ila operasyon agud masirado ang tanan nga mga Lotto, Keno kag Small Town Lottery Outlets.
Ini ang kasunod man sa mando ni Presidente Rodrigo Duterte nga ipasirado ang tanan nga mga outlets sang Philippine Charity Sweepstakes Office bangud sa kurapsyon.
Sa interview sang Bombo Radyo kay Iloilo City Police Office Director Police Col. Martin Defensor Jr., iya ginpahayag nga gin-umpisahan na nila ang pagpasarado sang mga outlets kag ini ang padayunon pa sa mga masunod pa nga mga inadlaw.
Suno kay Defensor, arestuhon nila kag posible nga pasakaan sang kaso nga paglapas sa Republic Act No. 9287 ukon An Act Increasing the Penalties for illegal Numbers Gumes, ang mga madakpan nga padayon sa gihapon nga naga operate sang mga gaming outlets sang Philippine Charity Sweepstakes Office.
