ILOILO CITY– Wala pa sang may nabatun nga guidelines ang Iloilo City Police Office may kaangtanan sa pagdumili sang sugal sa mga namatyan.
Ini ang kasunod sang pahayag ni Philippine National Police Chief Police General Archie Gamboa nga ginadumili-an ang pagsugal sa namatyan ilabi na kun masobra sa isa ka lamesa ang ginahampangan.
Sa interview sang Bombo Radyo kay Police Captain Shella Mae Sangrines, tagpamaba sang Iloilo City Police Office, iya ginpahayag nga may team nga nagalibot agud magpahibalo sa pumuluyo may kaangtanan sa pagdumili sang sugal.
Suno kay Sangrines, padayun man ang monitoring sa mga namatyan sa syudad sang Iloilo lakip na ang paghatag sang warning sa mga nagasugal.
Ginpahayag ni Sangrines nga nagapangayo sila sang pasaylo bangud nga ang pagsugal ang tradisyon na sa tion nga may namatyan apang kinahanglan nila nga ipatuman kun ano ang mandu nga nag-umpisa sa National Capital Region.
Nagalaum man ang natungdan nga mahangpan sang tanan nga ila lamang ginahimu ang katungdanan bilang law enforcers.
