Ginsapol sang Iloilo City Police Station 1 ang anom ka gangs sa siyudad sang Iloilo bilang kabahin sang ila tikang agud mapunggan ang kinagamo nga nagakatabo sa syudad.
Sa interview sang Bombo Radyo kay Pcapt. Melchor Tolentino, hepe sang Iloilo City Police Station 1, ginpahayag sini nga ginpatawag kag gin-estorya nila ang mga nasambit nga mga grupo kun sa diin kalabanan sa ila ang naga-edad 15 tubtob 18 anyos.
Suno kay Tolentio nga ginsingganan man nila ang mga ini nga indi mag-intra sa bisan ano nga kinagamo agud malikawan ang mga malain nga matabo sa ila.
Gin-engganyo man sang pulis ang mga miyembro sang gangs nga imbis mag-upod sa illegal nga aktibidad, magpartisipar na lamang sa mga religious kag sports activities.
Ini nga tikang kasunod man sang nagluntad nga insidente sa Fort San Pedro, Iloilo City Proper kun sa diin nabutang sa alanganon ang kabuhi sang isa ka menor de edad matapos ini maigo sang kutsilyo nga ibuno sang iya kontra.
Nagapanawagan naman ang Iloilo City Police Station 1 sang kooperasyon sang ginikanan kag komunidad agud mabantayan ang kabataan kag magbinuligay sa pagmintinar sang katawhayan sa siydad.
