ILOILO CITY – Nagapanawagan ang Iloilo City Police Station 1 sa ginatudlo suspek nga nagtiro sang sang isa ka pahenante sang delivery company sa isa ka convenient store sa corner Jalandoni St., Aurora Subd, Brgy Anita City Proper, Iloilo City Proper nga magsungka sa kapulisan.
Ang biktima amo si Jose Palacios, 34, residente sang Negros Occidental apang temporaryo nga nagapuyo sa distrito sang Arevalo.
Sa interview sang Bombo Radyo kay Police Major Shella Mae Sangrines, station commander sang Iloilo City Police Station 1, iya ginpahayag nga ang suspek amo si Joseph Castro Jaleco sang Dumangas, Iloilo.
Suno kay Sangrines, may information sila nga nabaton matapos nga ginpalapta ang litrato nga kuha sa closed circuit television (CCTV) nga amo ang nagtudlo sang identity ni Jaleco.
Nag-coordinate na ang Police Station 1 sa Dumangas Police Station apang nagatutok ang kapulisan diri sa syudad sang Iloilo.
Nagpanawagan naman ini kay Jaleco nga magsungka sa kapulisan agud nga mahatagan sang due process.
Nahibaluan nga base sa imbestigasyon sang kapulisan, samtang nga nagadiskarga sang suplay sang dry goods ang biktima, may indi pag-intindihanay nga natabo sa tunga nila sang suspek nga gilayon nga nagbunot sang armas kag gintiro ang biktima.
Naka-agum sang minor nga pilas sa kamot ang biktima kag gilayon naman nga nagpalagyo ang suspek sakay sa motorsiklo upod ang isa ka babayi.
