ILOILO CITY – Padayon pa nga ginasundan sang Iloilo City Police Station 1 ang tanan nga closed circuit television nga mahimo makatudlo sang identity sang suspek nga nagtiro sa isa ka fish vendor sa Iloilo Terminal Market.
Ang biktima amo si Melvin Roque, 46, residente sang Barangay Rizal Pala-pala II, Iloilo City Proper, kag ginapahayag duha ka tuig na nga nagabaligya sa merkado.
Si Roque ang gintiro sang wala pa nakilala nga suspek nga suno sa mga nakakita, nagasuksok sang pula nga jacket, naka-helmet kag gamay ang panglawason.
Sa interview sang Bombo Radyo kay Police Major Shella Mae Sangrines, station commander sang Iloilo City Police Station 1, iya ginpahayag nga ginasunod nila ang tanan nga mga closed circuit television nga mahimo maagyan sang suspek.
Apang suno kay Sangrines, halos indi klaro ang kuha sang tanan nga mga cameras.
Dugang pa niya, tubtob pa lamang sila sa Iloilo City Proper area kag wala pa nakalab-ot sa iban nga mga distrito.
Sa subong, illegal nga droga sa gihapon ang ginalantaw nga motibo sang kapulisan.
Wala man ginadula sang kapulisan ang anggulo nga posible may naka-away ang biktima.
