Ginpasalig sang Iloilo City Government nga indi madulaan sang palangabuhian ang mga driver sang tricycle samtang gina-amat amat na finalize ang tricycle route plan sa syudad sang Iloilo.
Ang tricycle route plan ang ginadihon sunod sa national guidelines kag kasunod man sang pagpa-guwa sang Local Public Transport Route Plan (LPTRP) sa syudad.
Sa interview sang Bombo Radyo kay Mr. Jeck Conlu, head sang Public Safety and Transportation Management Office (PSTMO), iya ginpahayag nga sa idalom sini nga bag-o nga route plan, indi pagtugutan ang mga tricycle nga makabyahe sa national highways.
Limitado ang byahe sang mga tricyle sa barangay roads ukon pasulod sa mga subdivision.
Ginpaathag man ni Conlu nga sa pagdihon sang route plan, ginkonsiderar na ang mga areas nga nadala sa Iloilo City Comprehensive Land Use Plan (CLUP).
Ginatan-aw suno kay Conlu kun sa diin nga mga dalan ginapanan-aw nga may development ukon mapatindugan sang commercial buildings ukon mahimo nga ma-develop kag madamo na ang mga tawo lima ka tuig umpisa subong.
Ginhimuan sang ruta ang mga jeep diri nga mga lugar sa idalom sang LTPRP.
I-desinyo naman ang tricycle route plan nga indi makabyahe ang tricycle drivers sa mga ruta nga maagyan sang modernized jeepneys, apang indi sila madula suno kay Conlu, bangud plastaron man nga may mabyahe-an sa gihapon ang mga tricycle.
Sa subong suno kay Conlu, may serye naman sang konsultasyon ang city government sa tricycle associations sa kada distrito kag may patigayunon nga hearing sa Iloilo City Council. ##
